Ei pilegrimsvandring utanom det vanlege

Sunnivaleia knyter saman dei to heilage øyane Kinn og Selja. Ho går langs kysten frå Florø, via Kinn, over Bremangerlandet, via Vågsøy og til Selje. Leia består av fleire vandreetappar i vakkert og variert kystlandskap, bunde saman med båt og buss. Du kan vandre på eigenhand, eller delta på organiserte vandringar.

Kvart år vert det arrangert vandringar i Sunnivaleia, gjerne med utgangspunkt i Kinnaspelet i slutten av juni. På dei organiserte vandringane er det med prest. Sjå programmet for årets vandring her: Vandringar

Historia

I år 996 utropte Olav Tryggvasson Selja til den fyrste heilagstaden i Noreg. Sunniva vart helgenkåra. St. Sunniva er Noregs einaste kvinnelege helgen, og segna om ho var svært viktig i kristninga av Noreg. Soga fortel at Olav den Heilage gjekk i land på Selja for å knele i kapellet i Sunnivahola då han vende tilbake til Noreg frå England i 1015 for å vinna kongsmakt. Både Kinn og Selja var pilegrimsmål.

I mellomalderen var kysten den fremste ferdselsvegen. Dei fleste langvegsfarande pilegrimar i Noreg reiste sjøvegen og segla forbi dei to øyane på veg mot Nidaros. Kinn og Selja var naturlege stoppestadar for dei sjøfarande pilegrimane. I tillegg til Selja sin status som heilagstad og bispesete, gjorde plasseringa rett ved det lumske Stadhavet øya til eit geografisk og sosialt knutepunkt.

Notid

I dag kjem atter pilegrimar til Kinn og Selja. Sunnivaleia heiter den nye pilegrimsleia frå Kinn til Selja. Ho er eit kystalternativ til pilegrimsvandringane i innlandet. Dette er ei vandring over sjø og land. Ei pilegrimsvandring langs norskekysten byr på andre opplevingar og utfordringar enn innlandsrutene. Det vakre, men ville kystlandskapet, skore tvers over av fjordar og med det mektige Atlanterhavet brusande inn rundt øyane – som Kinn og Selja, byr på storslagen natur, naturkrefter som fyller hjarta og sjel, men også roleg hav til ettertanke og refleksjon.

Ei vandring langs Sunnivaleia kan gjerne leggast inn som ei vandreetappe langs Kystpilegrimsleia om du ønskjer ein lengre tur. 

Vil du oppleve Sunnivaleia?