Pilegrimsferd mellom to heilagstader
Sunnivaleia er ei pilegrimslei over sjø og land mellom øyene Kinn utanfor Florø og Selja utanfor Selje. Leia går også over Bremangerlandet og Vågsøy. Mellom øyene må du ta hurtigbåt og ferje. På land er det merka pilegrimsruter i terrenget, og noko asfaltveg.
I gamal tid gjekk all ferdsel langs kysten med båt. Vi har tilrettelagt ei merka pilegrimslei med vandreetapper i tillegg til båt. Vandreetappene tek deg til historiske stader som truleg også har vore besøkt av pilegrimar i mellomalderen, som Kinnakyrkja på Kinn, den gamle kyrkjestaden på Grotle i Bremanger og Selja kloster og helgenanlegg – sjølve helgenstaden til Sta. Sunniva og Noregs første pilegrimsmål.
Både på Selja og på Kinn blir helgendagen Seljumannamesse til minne om Sta. Sunniva og Seljemennene framleis feire 8. juli kvart år.
Foto: Eva Laukøy
